Hernaniko klausula sozialak

Bi lan ildok bat egin zutela esan daiteke. Batetik, Tokiko Garapen Departamentua azken urteetan egiten ari den lana Ekonomia Sozial Eraldatzailearen ikuspegitik. Bestetik, Berdintasun Arloan garatzen ari den genero zeharlerrotasunaren ildoa dago, non genero klausulen lanketarekin hasi nahi zen. Denboran, Kontratazio Lege berriarekin topatu ginen, zeinak kontratu publikoetan klausula sozialak sartzera derrigortzen duen. Aukera ona iruditu zitzaigun, hortaz, lege berri hau baliatzea, udaletik kontratazio arduratsuagoa egiteko, zehar lerroko gaiei garrantzia emateko eta kontratazio berriak egiteko prozedura bateratu bat zehazteko.
Helburuak: klausula sozialak udaleko departamentu guztietan barneratzea eta zehar lerro bezala landua izatea; kontratazioetan pleguak lantzeko prozedura bateratu bat zehaztea.

Apustu politikoa egin zen (erabakia hartu); formakuntza egin zen udaleko teknikarien artean (harrera ona izan zuen), talde zabala bildu zen; lantalde txikia osatu (alkatea, zerbitzu sozialetako hautetsia, eta ingurumen, tokiko garapen, babes zibil, kontratazioa berdintasun, euskara eta babes sozialeko teknikariak).
Gaur egun kontratazioak eta pleguak nola landu diren aztertu da, eta hutsuneak identifikatu dira. Hori kontuan hartuta prozedura berri baten zirriborroa landu da lan talde txikian. Asmoa da, bi kontraturekin (obretako bat eta zerbitzuetako bat) proba pilotuak egitea. Fase horretan gaude momentu honetan.

Indarguneak: babes politikoa da indargunea. Prozesuan sinetsi da, eta horrek ematen dio bultzada, baita baliabideak jarri izana ere.
Ahulguneak: Denbora falta eta elkar lanerako ohitura, eta horrek zailtasunak ekartzen ditu. Udalean oso sistematizatuta dago lan banaketa.

Ez du koste ekonomikorik. Dedikazioa da gehiago. Ondoren, klausula bakoitzaren baitan ematen den gastuan du eragina. Egindako formazioak koste bat izan du. Horrez gain, talde txikiaren gidaritza eta dinamizazioa Berdintasun Arlotik lantzen ari dira, genero-zeharlerrotasuna garatzeko lanketaren baitan kokatu baita eta bertan aholkularitza batekin ari gara lanean. Aurrera begira aurreikusten da taldearen gidaritza emateko eta formatzen joateko baliabide ekonomikoak beharko direla.