Auzozaintza

Herriko biztanleriaren zahartze prozesu bat ematen ari dela ikusi eta biztanle asko bakardade egoera ez hautatuan bizi direla ikusteak kezka sortzen zuen Hernaniko Udalean, eta horri aurre egiteko ekimen desberdinak sortzen hasia zen herriko eragileekin batera. Horrez gain, 2016an Hernaniko Udalak beste hiru herrirekin batera emakume baten herentzia bat jaso zuen, eta bere testamentuan argi utzi zuen udalek diru hori zertarako erabili behar zuten: bakardade egoeran dauden eta bitartekorik ez duten adinekoei laguntzeko ekimenak egiteko. Amaitzeko, 2020an Beterri – Buruntza eskualdean Zaintza erregimenaren diagnostikoa eta ekintzarako proposamena egin ziren. Bertan, agerian geratzen zen zaintza lanetan dihardutenek bizi dituzten baldintza kaxkarrak.
Helburuak: adineko pertsonak bakardade egoeran bizitzetik, bere auzo edo komunitatean bere bizitza modu autonomoan garatzea izango da. Bestetik, zaintzaren eta mendekotasunaren esparruan lan egiten duten emakume migranteen inklusio soziolaborala sustatzea.

Adinekoen hautatu gabeko bakardade egoeretan eragitea. Lehenbizi diagnosi bat egiten da pertsona horiek identifikatzeko, "Teknoadineko" izeneko geolokalizazio tresnaren bitartez. Tresna honek datu eguneratuak izatea ahalbidetzen du eta gainera mapa batean geolokalizatuak. Datu hauek guztiak Udalaren serbidorean gordetzen dira. Ostean eskuhartzea dator: Udala harremanetan jartzen da detektatu den pertsonekin eta banakako esku-hartze bat proposatzen zaio. Esku-hartze hori hezitzaileek diseinatzen dute eta pertsonaren araberako helburuak ezartzen dituzte. Adineko pertsonarekin zuzenean "Bidelagun" figurak egongo dira, eta eskuhartzearen beste erpin batean, "Auzozain" figura:-Sistema guzti honekin, hirugarren elementua lortzen dugu: komunitatea.
Zaintza lanetara dedikatzen diren emakume migratuen inklusioa bultzatzea. Adinekoen eskuhartze blokean Bidelagun figura Hernanin sortua den Maitelan kooperatibako kideek egingo dute. Maitelan kooperatiba irabazi asmorik gabeko kooperatiba bat da , Hernanin zaintza lanetara dedikatzen diren emakumen migratu batzuen artean sortu dutena. Langile hauek jardunaldi osoko lanaldia izango dute eta horren barruan, jardunaldiaren %15a formaziora dedikatua. Lehen fase honetan euskara klaseak jasoko dituzte, horrek aurrera begira lan inklusioan lagunduko dietelako. Langile hauek Gipuzkoako eskuhartze sozialeko lan-hitzarmenaren araberako baldintzak izango dituzte.

Proiektua oraindik froga pilotuaren fasean dagoenez, zaila da ebaluatzea. Hala ere, egitasmoa martxan egon den hilabete hauetan zehar, emaitza batzuk ikusteko balio izan du. Alde batetik langileak enpoderatu egiten dira. Bestetik, epe motzean aldaketak nabaritzen hasi dira erabiltzaileengan eta azkenik, erakunde eta eragileen artean lan egiteko beste modu bat ipini da praktikan. Gainera, biztanlegoaren osasuna sustatu eta mendekotasunak ekidin edo atzeratu egiten dira.

Proiektua Udalak finantzatu du bere osotasunean. Alde batetik, herentziatik jasotako dirua, diagnosi eta esku hartze blokeak finantziatzeko erabiliko da (250.000/urteko) eta bloke komunitarioa, Udalak asumituko du.